- 9 sentyabr 2018
- 1 066
- 0
Ayşə SƏYYADQIZI Şeirlər
HEÇ?
Nadan özün tərif edər,
Arif özün öyərmi heç?
Ömür sürüb alçaqlıqla,
Yaşamağa dəyərmi heç?
İstər şah ol, istər nökər,
Ağac da yarpağın tökər,
İnsan oğlu yuva tikər,
Bir budağı əyərmi heç?
Göz görəndir, ürək duyan,
İnsan deyil utanmayan,
Haram çörək qazanmayan,
Haram tikə yeyərmi heç?
Sığınıb şöhrətə, ada,
Vermədim ömrümü bada,
Haqqı sevən bu dünyada,
Ağa qara dəyərmi heç?
Həyatın budur qaydası,
Xainin olmaz yuvası,
Zər ola şeytan libası,
Ayşə dönüb geyərmi heç?
SİZƏ
(Şöhlət Abbasa ithaf edirəm)
Yazdınız Allahdan, söylədiz haqdan,
O da pay göndərdi nurlu sabahdan,
Qaynarlıq veribdir oddan,ocaqdan,
Həzinlik bəxş edib havadan sizə,
Yar olsun dünyanı yaradan sizə!
Gözə nur bəxş edib, sözə əzəllik,
Sizə taqət verib, qəlbə gözəllik,
Ülvilik, alilik, saflıq, özəllik,
Verməyib heç nəyi sıradan sizə,
Yar olsun dünyanı yaradan sizə!
Haqqın dərgahında nə nökər, nə şah,
Bir tutur hər kəsi qatında Allah,
Bəlkə də min savab yazıbdır Vallah,
Bir insan etdiyi duadan sizə,
Yar olsun dünyanı yaradan sizə!
Bir qızıl zərlikdən çöplüyə enə,
İtirməz qiymətin, qızıldı yenə,
Yüz dövran dolana, yüz dövran dönə,
Tay olmaz qiymətdə hər adam sizə,
Yar olsun dünyanı yaradan sizə!