- 22 yanvar 2021
- 854
- 0
Şöhlət Abbas Dünya bizim...
Şöhlət ABBAS
DÜNYA BİZİM...
Dünya bizim kənd boydaydı,
Hər məhəllə - kiçik ölkə.
Məndən xoşbəxti yoxuydu,
Elə bədbəxti də bəlkə.
Hərdən qaçıb sığınardıq
Anamızın qucağına.
Xatirədən boylanıram
İndi ömrün o çağına.
Yaman nazlı-duzlu idi
Qonşumuzun qara qızı.
Dili şirin sözlü idi
İlk eşqimin yaramazı.
Üzüyola, sözəbaxan,
Hərdən tənbəl, dəcəl idik.
Hərdən azman bir qəhrəman,
Hərdən kosa, keçəl idik.
O çiçəkli, güllü günlər,
Gənclik – ömrün qızıl tacı.
Xatirələr sızlar, inlər, -
Qocalığın ehtiyacı...
Dünya bizim kənd boydaydı,
Hər məhəllə - kiçik ölkə.
Məndən xoşbəxti yoxuydu,
Elə bədbəxti də bəlkə.
Bakı, 21.01.2021.