20-22 oktyabr 2022-ci il tarixində Türkiyənin Alanya Alaaddin Keykubad Universitetinin təşkilatçılığı ilə XIV Beynəlxalq Dünya Dili Türkcə Simpoziumu keçirilib. 19 ölkədən 358 alimin iştirak etdiyi bu simpoziumda Bakı Slavyan Universitetini (BSU) Filologiya fakültəsinin dilçi alimləri dos. Gülnarə Əliyeva-Koşkun və dos. Ziyafət Qasımova uğurla təmsil ediblər.
Layihə müəllifi prof. A.Gözəlin açılış nitqi ilə başlayan simpozium prof. A.B.Ercilasun, prof. U.T.Günay, prof. G.Gülsevin, prof. N.Demir və prof. F.Kılıçın çıxışları ilə davam etdirilib. Beynəlxalq tədbirdə Mahmud Kaşğarlının “Divanü Lüğəti’t-Türk” - 950, Əlişir Nəvai və türkcə, türk dili və türk mədəniyyəti araşdırmaları, tarixi və müasir türk dilləri, türk lüğətçiliyi, dialektologiya, dil siyasəti, dünyada türkologiya və türkcə təhsil, türk xalqları ədəbiyyatına dair məruzələr dinlənilib.
Bakı Slavyan Universitetinin Türkologiya kafedrasının dosenti Gülnarə Əliyeva-Koşkun “Postsovet dövrü Azərbaycanda lüğətçilik araşdırmaları”, Azərbaycan dilinin tədrisi metodikası kafedrasının əməkdaşı dosent Ziyafət Qasımova “Azərbaycan Üniversitetlərində “Akademik yazı və oxu (Türkiyə türkcəsi)” dərslərində Türkiyə türkcəsinin öyrədilməsi haqqında (Bakı Slavyan Üniversiteti örnəyi)” mövzularında məruzələrlə çıxış ediblər. Alimlərin çıxışları maraqla dinlənilib. İştirakçılara təşkilat komitəsi tərəfindən sertifikatlar təqdim olunub. Simpoziumun elmi heyətinin üzvü olan dos. Gülnarə Əliyeva-Koşkun həm də bölmə iclaslarının birinə sədrlik edib.
Üç gün davam edən simpozium müxtəlif mövzular üzrə təşkil olunan bölmə iclasları ilə öz işini davam etdirib. Bölmə iclaslarından sonra simpozium iştirakçıları üçün təşkil olunan “Çırpınırdın Qara Dəniz” mahnısı ilə Türk dünyasının məhəbbətini qazanan, “İki dövlət, bir millət” sözünə sadiq qalan Azərinin konserti ilə Alanya Alaaddin Keykubad Universitetində tarixi qardaşlıq və birlik örnəyi göstərilib. Simpoziumun sonuncu günü qonaqlar Alanya şəhərinin tarixi və görməli yerləri ilə tanış olublar.
Təranə ŞÜKÜROVA.