Bu həyatı yavaş-yavaş öyrənirik,Bir az təpik,
bir az çəpik,
bir az daş-baş öyrənirik.
Dağın ətəyi, zirvəsi,
Buludu, çən-dumanı var.
Ürəyin coşa gəlməsi,
Ümidi var, gümanı var.
Başdan-başa təzad dolu
Bir dünyada yaşayırıq.
Bəzən nifrət etdiyimiz
Bir nəsnəni oxşayırıq.
Bolluq, işıq olan yerə
Qələbəlik, axın olur.
Bəzən qədrin bilmədiyin
Sənə səndən yaxın olur.
Gizli sevgi, gizli nifrət
Yanaşıdır ömrümüzdə.
Elə sevginin, nifrətin
Yarışıdır ömrümüz də.
Dünya - yarış, ver əlini
Bu yarışda qoşa olaq.
Dürlü-dürlü əməllərlə
Ürəklərdə qoşa qalaq.
Bakı, 11.02.2021, 21.02.2021.