GENERAL GƏLİR!..
(Şəhid general Polad Həşimovun nurlu xatirəsinə)
Üçrəngli bayrağı alnından asıb,
Əcəlin üstünə adını yazıb.
Vətən harayını bağrına basıb.
Üzündə təbəssüm. dili lal gəlir,
Torpaq, qalx ayağa, general gəlir!..
Mübarək şəhiddir, ucadır soyu,
Həzi Aslanova çəkir bir suyu.
Xainlər yolunda qazdılar quyu.
Döyüş yollarına nəzər sal, gəlir,
Torpaq, qalx ayağa, general gəlir!..
Uçurdub fələyin qalalarını,
Gözü yolda qoyub balalarını,
Anıb anasının laylalarını,
Ana tək boynuna qolun sal, gəlir,
Torpaq, qalx ayağa, general gəlir!..
Keçib Qəbələdən Qələbəyədək,
Qeyrət ocağıdır köksündə ürək.
Doğma Vəndamına əl eyləyərək,
Polad əqidəli nurcamal gəlir,
Torpaq, qalx ayağa, general gəlir!..
16.07.2020.
QƏLƏBƏ ƏTRİ
Baxma çöllərinə payız qonubdur.
Daha yaz qoxuyur bəxtin, Qarabağ.
Sil göz yaşlarını Xarıbülbülün,
Bitib ayrılığın vaxtı. Qarabağ.
Vüsal zirvə-zirvə gülümsəyir bax,
Əriyir sən adlı həsrətin qarı.
Açıb yaxasını öz balan kimi
Yüyürür üstünə Zəfər yolları.
Zəfər qoxusuna bələnib, Allah,
Şəhid qəbri üstə yağan göz yaşı.
Sevincdən bir addım atır elə bil,
Bu məzar üstündə duran baş daşı.
Verin Natəvana gözaydınlığı.
Dinləyin Bülbülün şirin səsini.
Xan əmi yenə də qaval götürüb,
Oxusun Qarabağ şikəstəsini.
Mərmi yağışına düşən payızda,
Sərin ümidlərin bahar qoxulu.
Qələbə ətrini səpir yollara
Ali Baş Komandan Heydərin oğlu!
05.10.2020.
BAYRAQ
Mənası uludur, hikməti dərin.
Qanından rəng alıb neçə min ərin.
Şuşa qalasını alan əsgərin
Təbəssümlə dolu üzüdür bayraq.
Ürəklər boyuna açıb qucağın.
Şərəf tarixidir ötən hər çağın.
Millətin qəlbində yanan ocağın.
Heç vədə sönməyən közüdür bayraq.
Bir üzü Turandır. bir üzü Quran
Qalalar endirən, sərhədlər quran.
Oğul qəbri üstə səssizcə duran
Şəhid anasının gözüdür bayraq.
Şanlı zəfərinlə, vətənim, tanın,
Şəhid ətirlidir damarda qanın.
Qələbə soraqlı Baş Komandanın
Yurdda dalğalanan sözüdür bayraq.
Dağlarda qalmayıb nə duman, nə çən,
Şöhrətin boy verir zirvələrəcən.
Bu torpaq uğrunda canından keçən
Şəhid oğulların özüdür bayraq.
- 24 noyabr 2020
- 1 329
- 0