- 21 noyabr 2020
- 752
- 0
Şöhlət Abbas MƏNƏ DƏ...
Şöhlət ABBAS
MƏNƏ DƏ...
Mənə də vaxt ayır yadına düşsəm,
Barı bir zəng elə, hal-əhval soruş.
(O görüş deyəsən birinci idi,
Həm də ki hələlik sonuncu görüş.)
Daha gənc deyilik, iş işdən keçib,
Daha qısqanılan vaxtımız deyil.
Sevimli, romantik görüşdən keçib,
Utanan, danlanan vaxtımız deyil.
Bir ovuc xatirə, yorğun təbəssüm,
Bəlkə də söz sözə calana bir də.
Əlindən tutanda əlim titrəsin,
Qollarım belinə dolana bir də.
Bəlkə də bir kitab nağıl danışaq
Sən öz həyatından, mən də özümdən.
(O çəkingən oğlan – utancaq uşaq,
Yəni elə özüm düşəm gözümdən.)
Daha mənlik deyil, iş sənə qalıb,
Arada vaxt tapsan, gözəl olardı.
Hardasa bir görüş-təntənə qalıb,
Bir də ki bir nağıl: “İki gənc vardı..”
16 iyul 2019-cu il.